TV “SCAN“, Puna e denjë në Shqipëri”, Studimi: Cila është hapësira që zë në programet e subjekteve kryesore politike

“Qendra Për Të Drejtat e Punëtorëve është duke kryer një proces monitorimi në kuadër të fushatës zgjedhore duke patur si qëllim vlerësimin e përfshirjes së punës së denjë në programet e partive politike parlamentare. Nga hulumtimi i këtyre programeve nuk vërehet në asnjërën prej tyre detyrimet që rrjedhin nga marrëveshja e firmosur  me organizatën ndërkombëtare të punës, ILO.

Sipas ILO, “puna e denjë” është një ndër çështjet më të rëndësishme për vendet në zhvillim, e cila duhet të reflektohet në qeverisje. “Puna e denjë” është një detyrim kontraktual i dyfishtë për shtetin shqiptar. Këto detyrime rrjedhin nga anëtarësimi i Shqipërisë në ILO dhe ratifikimi i konventave bazë të saj. Njëkohësisht, Shqipëria ka ratifikuar dhe rezolutën e OKB, mbi “Objektivat e Zhvillimit të Qëndrueshëm ”.

Organizimet politike që marrin pjesë në garën elektorale parlametare duhet të kenë pjesë të programit të tyre trajtimin e 4 komponentëve të “punës së denjë”:

1. Të drejtat e punëmarrësve
2. Politikat e punësimit
3. Mbrojtja shoqërore
4. Dialogu social

Por nga monitorimi i bërë nga CLRSD deri në datën 1 maj 2017, në të gjitha programet politike të partive përfshihet trajtimi i gjerë i politikave të punësimit dhe të mbrojtjes shoqërore, por nuk përfshihen komponentët e dialogut social dhe të drejtat e punëmarrësve.

Më konkretisht, LSI është e vetmja parti që i përfshin elementët e të drejtave të punëmarrësve. Asnjëra nga partitë nuk trajton çështjet e dialogut social (trepalësh), duke vënë re se çdo parti ka vendosur fokusin në zbutjen e tensioneve shoqërore dhe promovimin e punësimit.

“Puna e denjë në Shqipëri”! Studimi: Cila është hapësira që zë në programet e subjekteve kryesore politike