Drejtuesit e CLRSD takojnë kreun e Bashkimit të Sindikatave të Pavarura të Shqipërisë (BSPSH)
![Drejtuesit e CLRSD takojnë kreun e Bashkimit të Sindikatave të Pavarura të Shqipërisë (BSPSH)](https://i0.wp.com/clr.al/wp-content/uploads/2023/02/img_2382-e1485196147941-1.jpg?fit=300%2C156&ssl=1)
![](https://i0.wp.com/clr.al/wp-content/uploads/2023/02/img_2382-1.jpg?resize=300%2C225&ssl=1)
Drejtuesit e Qendrës për Marrëdhënie Pune dhe Dialog Social (CLRSD) u pritën në një takim prezantues me kreun e Bashkimit të Sindikatave të Pavarura Shqiptare z. Gëzim Kalaja. BSPSH, themeluar që në vitin 1991 është një organizatë vullnetare gjithëkombëtare me mision realizimin e përfaqësimit të punonjësve shqiptarë në mbrojtje të interesave të tyre social ekonomike.
Përfaqësuesit e CLRSD parashtruan gjatë këtij takimi objektivat kryesore të qendrës mes të cilave nxitjen e bashkëpunimit me organizata të ndryshme, institucione publike, sindikata e fondacione me qëllim luftën e fenomeneve negative në marrëdhëniet e punës dhe në përgjithësi në shoqëri.
“BSPSH e sheh me shumë kënaqësi krjimin e një Qendre të tillë me ndihmen e Oloff Palme International Centre dhe SIDA, për të mbështetur fuqizimin e lëvizjes sindikalisste në Shqipëri si dhe forcimine kapaciteteve sindikale në nivel lokal”, vlerësoi z.Kalaja ndërsa kërkoi që qendra e re CLRSD të mundësonte një bashkëpunim me BSPSH dhe Konfederatën suedeze të punëtorëve (Swedish Trade Union Confederation).
Kreu i Bashkimit të Sindikatave të Pavarura Shqiptare z.Gëzim Kalaja shpjegoi rolin e kësaj organizate në forcimin e lëvizjes sindikaliste në Shqipëri, një përpjekje që nis që me lëvizjen e njohur të minatorëve të Valiasit ku spikatën edhe kërkesat e para për demokraci e pluralizëm.
“Qëllimet kryesore dhe objektivat e BSPSH janë transformuar nga ato me theks politik të fillim viteve ’90 tek të drejtat e punëtorëve, përmirësimi i kushteve të tyre ekonomike e shoqërore dhe forcimi i dialogut social”, u shpreh z.Kalaja.
Sipas tij, një nga arritjet më të fundit në këtë aspekt është dakordësia me qeverinë për të ulur moshën e faljes në pension të minatorëve nga 60 në 55 vjeç.
Gjatë takimit u diskutua edhe për përpjekjet e debatet lidhur me hartimin e miratimin e një statusi për minatorët. Referuar kësaj teme, z.Kalaja nënvizoi se më shumë se statusi, rëndësi ka zbatimi korrekt i Kodit të Punës dhe rritja e nivelit të mirëqenies së punëtorëve.
Drejtuesit e CLRSD dhe BSPSH u dakordësuan për thellimin e bashkëpunimit ndërsa shumë shpejt do të organizohet edhe një takim në nivel teknik për të diskutuar në detaje planin e aktiviteteve të përbashkëta.