CLR: Monitorimet dhe rekomandimet mbi ecurinë e procesit të punës gjatë pandemisë Covid-19
“Sindikata e Punonjësve të Qendrave të Kontaktit” SPQK po ndjek nga afër situatën e krijuar nëpër Call Center-a për shkak të epidemisë së Koronavirusit.
Duke ndjekur në mënyrë të vazhdueshme udhëzimet e Qeverisë së Republikës së Shqipërisë dhe duke qenë në mënyrë të vazhdueshme në kontakte me Inspektoriatin e Punës dhe organet e tjera shtetërorë si dhe me Punëdhënësit dhe përfaqësues të tyre nëpër Call Center-a ku ne kemi edhe të përfaqësuarit tanë vërejmë:
1)Masat e vendosura nga Qeveria janë absolutisht minimale përsa i përket Call Center-ave (është e kotë të bësh një dezinfektim e pastaj të mbledhësh 200 veta në një sallë)
2)Mungon mjeku i kompanisë nëpër vendet tona të punës si dhe çfarëdo lloj mase mbrojtëse (Maska dhe doreza e dezinfektant në mënyrë të mjaftueshme)
3)Mungon ajrimi i vazhdueshëm edhe konstant.
4)Nuk zbatohet nga punëdhënësit dhe Administrata e Call-Center-ave ajo që quhet “Smart-Working” pra puna nga shtëpia nëpërmjet kompjuterit megjithësë është diçka krejtësisht në dorë të tyre dhe plotësisht e realizueshme brenda një afati shumë të shkurtër.
5)Nuk është marrë asnjë masë për transportin e punonjësve në këtë gjendje shtetrrethimi dhe punonjësit detyrohen të bëjnë me kilometra për t’u paraqitur në punë pasi përballen me frikën e pushimit nga puna në mënyrë të padrejtë.
Sindikata e Punonjësve të Qendrave të Kontaktit “SPQK” kërkon nga Qeveria e Republikës së Shqipërisë në mënyrë urgjente nxjerrjen e një Pakete Masash Sociale për Sektorin e Call Center-ave. Ajo duhet të detyrojë kompanitë të zbatojnë “Smart Working”, pra punën nga shtëpia për punonjësit e tyre, atje ku nuk është e mundur të paguajnë punonjësit që detyrohen të rrinë në shtëpi.
Është e kotë të mbyllim bar-kafet, restorantet e tubimet publike kur nëpër Call Center-a kemi grumbullime deri në 300-400 veta për çdo sallë.
Për të gjithë punonjësit, anëtarët tanë, familjet e tyre dhe gjithë shqiptarët ju lutemi zbatoni rregullat e higjenës, mbroni veten e gjithë të tjerët.
