Mosmarrëveshjet individuale dhe kolektive në punë

Seminari i rradhës i Akademisë së Punës, përgatitur nga Qendra për të Drejtat në Punë/CLR dhe ekspertë të tjerë të fushës, u zhvillua mbi temën e
mosmarrëveshjeve në punë.
Por çfarë janë mosmarrëveshjet në punë?
Leksioni u zhvillua në një formë të veçantë duke sjellë fillimisht përvojat personale përpara shpjegimit të koncepteve juridike.
Cila është origjina e mosmarrëveshjeve në punë; ndryshimi mes
mosmarrëveshjeve dhe konflikteve; zgjidhja e mosmarrëveshjeve me dialog me qëllim parandalimin e konfliktit dhe grevës në punë; roli i pazëvendësueshëm i ndërmjetësimit dhe rëndësia e ndërhyrjes së shpejtë për zgjidhjen e konflikteve; palët në konflikt, Zyra e Pajtimit dhe Gjykata e Arbitrazhit; ishin disa nga temat më interesante të seminarit.
Nga shembujt e shumtë që u sollën nga të pranishmit u arrit në përfundimin që pjesa më e madhe e mosmarrëveshjeve, qofshin ato në sektorin fason, në administratën shtetërore apo në profesionet intelektuale, kanë natyrë të ngjashme.
Kontrata e paqartë e punës dhe mungesa e njohurive përpara firmosjes së saj qëndrojnë në origjinë të shumë mosmarrëveshjeve kolektive dhe individuale në punë. Nga këtu buron edhe rëndësia e njohurive të punëmarrësve mbi legjislacionin e punës, të drejtat dhe detyrimet që burojnë nga Kodi i Punës dhe kontratat kolektive. Gjithashtu i pazëvendësueshëm mbetet roli i partnerëve socialë dhe aktorëve të tjerë të botës së punës në parandalimin dhe zgjidhjen e mosmarrëveshjeve kolektive.
Një nga shtyllat kryesore në të cilat Qendra për të Drejtat në Punë mbështet asistencën e saj të drejtpërdrejtë ndaj punëmarrësve shqiptarë dhe sindikatave në të cilat ata aderojnë është edhe klinika ligjore përmes ofrimit të ndihmës së specializuar për zgjidhjen e mosmarrëveshjeve kolektive të punës.