Legjislacioni i punës, CLRSD dhe BSPSH trajnojnë sindikalistët e rinj

Njohja e të rinjve përfaqësues të rrjetit rinor të Bashkimit të Sindikatave të Pavarura të Shqipërisë me legjislacionin shqiptar për marrëdhëniet e punës ishte tema e trajtimit të organizuar nga Qendra për Marrëdhënie Pune dhe Dialog Social në bashkëpuim me BSPSH. Trajnimi u ndoq nga 35 të rinj, anëtarë të sindikatave të ndryshme të BSPSH nga sektorë, fusha e profesione të ndryshme.  Fjala hyrëse u mbajt nga Z. Arian Hoxha i cili foli për qëllimet dhe objektivat e organizatës CLRSD. Ai u ndal tek rëndësia e këtij trajnimi informues për të rinjtë në lidhje me te drejtat e punes, punësimin e tyre dhe se si njohja e mirë e legjislacionit ndihmon në kuptimin e të drejtave dhe detyrave si punonjës.

Z. Gëzim Kalaja, presidenti i BSPSH, bëri një historik të shkurtër të sindikatave në Shqipëri. Ai foli për rolin dhe objektivat e sindikatave dhe rolin e tyre në shoqëri duke konsideruar sindikatat si avokat i punonjësve. Gjithashtu,ai u shpreh në lidhje me temën se është shumë aktuale për realitetin shqiptar duke konsideruar betejën e vazhdueshme për përmirësimin e kushteve ambjenteve të punës dhe sigurimit teknik dhe shëndetësor nga ana e sindikatave, diskutimit që po bëhet tani për rritjen e pages minimale dhe çështjen e sigurimit të punëve sipas aftësive.

Ekspertja Arjola Alika shpjegoi çështjet nga ana juridike duke iu referuar edhe rasteve konkrete. Znj.Alika preku fusha të ndryshme që nga ligjet që trajtojnë punësimin, llojet e kontratave të punësimit, largimet e padrejta nga puna dhe trajtimi i tyre ligjor duke përfshirë këtu edhe dëmshpërblimet që parashikon ligji në raste të tilla. Ajo theksoi rëndësinë e dialogut social në procedurën e punës dhe trajtimin e çështjeve të tilla.

Në tryezën e rrumbullakët pati diskutime të ndryshme, pyetje të shumta nga pjesëmarrësit në lidhje me legjislacionin, por gjithashtu ato ju referuan rasteve konkrete apo personale për të kuptuar më mire edhe se si dhe ku duhej të adresoheshin nëse përballeshin me situate të ndryshme në ambientet ku ato punojnë. Ishte një diskutim konstruktiv, ku të rinjtë kishin mundësi të paraqisnin problematikat e tyre dhe njihnin problamatikat që përballen punonjësit në fusha të ndryshme. Me kërkesë të pjesëmarrësve u kërkua që të bëhej dhe një trajnim tjetër në mënyrë që të përpilohej një listë me të gjitha problematikat e secilës nga sindikatat dhe qasjen që do bëhet për zgjidhjen e tyre.